Tiempo pasasqanman jina, jallpʼapi ashkha runasña karqanku. Casi tukuyninkutaj sajras karqanku. Wakin angelespis cielopi sajrayarqanku. Paykunaqa cielomanta kay jallpʼaman jamorqanku, runasman tukuspa warmiswan casarakunankupaj.

Chay angelesqa wawasniyoj karqanku. Wawasninkutaj wiñasqankuman jina kallpasapasman, sajrasman tukorqanku, runastataj mayta ñakʼaricherqanku. Jehová Diostajrí chay imasta mana qhawallarqachu. Chayrayku sajra runasta chinkachinanpaj, Jatun Parata apamunanta nerqa.

Jinapis uj cheqan runa karqa. Payqa Jehová Diosta munakorqa, sutintaj Noé karqa. Payqa warmiyoj, kinsa wawasniyoj karqa. Wawasninpa sutisnintaj karqa Sem, Cam, Jafet. Paykunataj sapa uj warmiyoj karqanku. Jehová Diosqa Noeman kamacherqa uj jatun arcata ruwananta, paywan familianwan Jatun Parapi mana wañunankupaj. Chay arcaqa uj jatun caja jina kanan karqa, yakupitaj tuytuyta atinan karqa. Chantapis Jehová Diosqa Noeman kamacherqa chay arcaman ashkha animalesta qhatiykunanta.

Noeqa chay rato arcata ruwayta qallarerqa. Paywan familianwanqa 50 wataspi jina chay arcata ruwayta tukorqanku. Jehová Dios nisqanman jinapuni chay arcata ruwarqanku. Chay tukuy wataspitaj, Noeqa runasman willarqa Jatun Para kananta, nitaj pipis kasorqachu.

Paykunaqa arcata ruwayta tukorqanku. Chantá imachus pasasqanta qhepan capitulopi yachakusunchej.