Huaquin huatacuna qꞌuipaca achca gentecunami causarca. Casi tucuicunami millaicuna carca. Huaquin angelcunapishmi millaicuna tucurca. Paicunaca jahua pachata saquishpami cai allpaman uriyamurcacuna. ¿Imapajshi shamurcacuna? Gentecuna shina tucushpa huarmicunahuan cazarangapajmi shamurcacuna.

Cazarashca qꞌuipaca huahuacunatami charircacuna. Chai huahuacuna huiñashpaca achca fuerzayuj, millai runacuna tucushpami gentecunata llaquichircacuna. Diosca millai ruraicuna ama tiyashpa catichunmi mana alli gentecunata tucuchinata yuyarirca. Achcata tamyachijpimi tucui allpata yacu taparca.

Pero Noé shuti runaca Diosta cazujmi carca. Paica shuj huarmitami charirca. Paipaj churicunaca Sem, Cam, Jafet shuticunami carca. Paicunapish huarmiyujcunami carca. Diosca Noetaca shuj arcata rurachunmi mandarca. Chai arcaca caspicunahuan rurashca jatun caja shinami yacupi huambuna carca. Shinami Noepish paipaj familiapish yacu juillumanta quishpiri tucurcacuna. Animalitocunapish ama huañuchunmi Diosca arcaman yaicuchichun mandarca.

Noeca Jehová mandashca shinami arcataca chai rato rurai callarirca. Paipaj familiandijmi casi 50 huatacunapi rurarcacuna. Chai tiempopica Noeca yacu juillu shamunatami gentecunaman huillarca. Pero, pi mana uyasha nircacunachu.

Arcaman yaicuna punllami ña chayarca. ¿Qꞌuipa ima tucushcata yachasha ninguichu?