Sar nakhlja o vreme, ki phuv hine but manuša. But oljendar hine lošna. Čak, disave anđelija ulje lošna. On mukhlje po čher ko nebo hem alje te živinen telje ki phuv. Da li džaneja sose čerdže odova? Te šaj te oven sar o manuša hem te ženinen pe.

Akala anđelija hem oljenge romnja hine ljen čhave. Ked barilje, oljenge čhave ulje but zoralje hem nasilna. On povredindže e manušen. O Jehova na manglja te oven asavke buča, odoljese odlučindža te uništini e lošno manušen ko Potop.

Ama, hine jekh manuš kova na hine sar avera manuša. Ov manglja e Jehova. Oljeso nav hine Noje. Ov hine lje romni hem trin čhave, o Sim, o Ham hem o Jafet, hem o sotrin hine ženime. O Jehova vačerdža e Nojese te čerel jekh bari arka te šaj ov hem oljesi porodica te spasinen pe ko Potop. I arka tani bari kutija ando kaš so šaj te ačhol upro pani. Isto adžahar, o Jehova vačerdža e Nojese te čhivel ki arka but životinje te šaj hem on te spasinen pe.

O Noje odmah počmindža te čerel i arka. Oljese hem oljese porodicače valjandža koro 50 berš te šaj te čeren la. On čerdže i arka adžahar sar so vačerdža ljendže o Jehova. Dži čerdža pe i arka, o Noje isto adžahar vačerdža e manušendže so ka ovel o Potop. Ama, niko na manglja te šunel lje.

Ko krajo, alo o vreme te khuven ki arka. Hajde te dikha so ulo palo odova.