Манушэн пэ ԥув ашэлас май бут и май бут. Вонэ почти всаворэ терэнас найдраго. Дэсавэ анӷелоря кадяжэ ашэлэ найлашэ. Вонэ ашадэ пэско ҭан по нэбо и змэклэпэ пэ ԥув. Ӷанэс васо? Вонэ закамлэ тэ ашэн, сар и мануша, кай тэ лэн пала пэстэ лэ манушнян.

Лэндэ арақаделэпэ шавэ. Кадэла шавэ вибарелэ и ашэлэ фартэ зоралэ. Вонэ на дэнас жизня лэ манушэнди и даравэнас лэн. О Иегова на ашадя када вся кадя. Важ када во закамля тэ стерэл о потопо па вся ԥув, кай кацавэн найлашэ манушэн будэр тэ на авэл.

Но сас ек мануш най кацаво, сар всаворэ. Во любияс лэ Иеговас. Лэс ақарэнас Ной. Лэстэ сас хулаи и трин шавэ. Лэн ақарэнас Симо, Хамо и Иафето. Лэтрин шавэ слинэ женати. О Иегова приԥэндя лэ Ноёсти тэ стерэл баро ковчеӷо, кай во и лэско ери тэ пэрэжувэн о потопо. О ковчеӷо, када баро ящико, саво плавуий па паи. О Иегова кадяжэ ԥэндя лэ Ноёсти тэ стидэл андо ковчеӷо разнонэ животнонэн, кай и вонэ тэ ашэнпэ жундэ.

О Ноё и лэско ери линэ тэ терэн о ковчеӷо. Пэ када лэндэ жыля варикай 50 бэрш. Вонэ стердэ о ковчеӷо кадя, сар ԥэндя лэнди о Иегова. Вся кадэя время о Ноё росԥэнэнас лэ манушэнди, кай дэла баро паи пэ вся ԥув. Но лэс нико на ашунэнас.

И акэ пашэля и время, кай тэ зажан андо ковчеӷо. Уӷанаса, со сас май англэ.