A si na mbeni ngoi, azo aga mingi na ndö ti sese. Mingi ti azo ni aga sioni. Même ambeni ange so ayeke na yayu aga sioni. Ala zia ndo ti ala so ayeke na yayu kâ na ala descend na ndö ti sese ge. Mo hinga ndani so ala ga na sese so? Tongaso si ala mû terê ti zo ala sara mariage na awali.

A-ange ni adü amolenge na awali ni so. Amolenge ni ayo mingi, ala yeke na ngangu mingi nga ala ga sioni mingi. Ala yeke sara sioni mingi na azo. Jéhovah apeut ti zia aye ni so angbâ ti gue gï tongaso ape. Ni la, lo mû desizion ti futi asioni zo ni so na yâ ti kota ngu so apika na ngoi ti Noé.

Me, mbeni koli ayeke dä so sarango ye ti lo ayeke tâ nde mingi. Lo ye Jéhovah. Iri ti lo ayeke Noé. Lo yeke na wali nga na amolenge ti koli ota, Sem, Cham na Japhet nga na awali ti amolenge ti lo ni. Jéhovah atene na Noé ti leke mbeni kota arche tongaso si lo na sewa ti lo alingbi ti sö fini ti ala na yâ ti kota ngu so ayeke pika. Arche ni ayeke tongana mbeni caisse so akono mingi so alingbi ti hon na ndö ti ngu. Jéhovah atene nga na Noé ti lï na gbâ ti anyama na yâ ti arche ni tongaso si ala kue alingbi ti sö kuâ.

Hio Noé akomanse ti leke arche ni. Noé nga na sewa ti lo asara kua ti lekengo arche so teti ngu 50 tongaso. Ala leke arche ni gï tongana ti so Jéhovah afa na ala ti sara ni. Na yâ ti oko ngoi ni so, Noé atene na azo so kota ngu ayeke pika ande. Me zo oko amä lo ape.

Fadeso ayeke ngoi ti tene ala lï na yâ ti arche ni. Zia e bâ ye so asi na pekoni.