Índo̱ ninújngoo mbiʼi, nikuwa mbaʼin xa̱bu̱ náa tsu̱du̱u̱ ku̱ba̱ʼ. Mbaʼin xkawiʼ a̱jkiu̱ún. Asndu tikhun ángeles niʼni xkawiʼ a̱jkiu̱ún. Niniñaaʼ mekhuíí náa kuwa, ikhú niguájtaa náa ku̱ba̱ʼ. Natayáá náa numuu ráʼ. Mu mani̱ndxu̱ún xa̱bekha ga̱jma̱a̱ xúʼko̱ mudiin gu̱ʼu̱.

Ángeles bugi̱ niguáʼdiin e̱ji̱n gajmiún gu̱ʼu̱. E̱jñún niʼni mixkujñunʼ wéñuʼ ga̱jma̱a̱ niʼni xkawiʼ a̱jkiu̱ún índo̱ ninuu, ga̱jma̱a̱ nini gíníi xa̱bu̱. Jeobá na̱nguá xóo maniñuuʼ marigá má xúʼko̱ dí raʼkhí. Ikha jngó niʼni gámbíin xa̱bu̱ xkawiinʼ náa mbá ruʼwa mbiiʼ, índo̱ nijnííʼ iyaʼ náa xúgíʼ tsu̱du̱u̱ ku̱ba̱ʼ.

Mú, nixtáa mbáa xa̱bu̱ bi̱ ninindxu̱u̱ mixtiʼkuii numuu rí ikhaa nindoo kaʼyoo Jeobá. Nigumbiʼyuu Noé. Nigiʼdaa a̱ʼgiu̱u̱ ga̱jma̱a̱ ajtsíin e̱ji̱i̱n: Sem, Cam ga̱jma̱a̱ Jafet. Mámbáa nigiʼdaa a̱ʼgiu̱u̱. Jeobá niʼthúu̱n Noé dí maʼni mbá arca, rí nindxu̱u̱ xóo mbá caja dí ixi̱, mú mba̱a̱ rí nandoo najngruámuuʼ náa inuu iyaʼ. Xúʼko̱ Noé gajmíi̱n bi̱ kuwa náa goʼwóo makáwíin náa Ruʼwa mbiiʼ. Ma̱ngaa Jeobá niʼthúu̱n dí makudiinʼ náa arca mbaʼin xujkhúʼ, mu mangiin makáwíin.

Nacha̱ má nigíʼdu̱u̱ niʼni arca Noé. Ikhaa gajmíi̱n bi̱ kuwa náa goʼwóo ndijñúnʼ mbá 50 tsiguʼ mu muni. Nini ikhaa kayúʼ xó má niʼthún Jeobá. Xúgíʼ tsiguʼ rí niʼni arca, Noé niʼthún xa̱bu̱ dí ma̱ʼkha̱ Ruʼwa mbiiʼ, mú nimbáa na̱nguá niʼnimbo̱o̱.

Ni̱jkha̱nú mbiʼi rí matu̱ʼu̱u̱n náa arca. Nandaʼ ma̱ta̱ya̱a̱ dí nirígá nda̱wa̱á ráʼ.