CIIYO 5
Bwato bwa Nowa
Mukuya kwaciindi, bantu bakavwula kapati munyika. Bunji bwabo bakali babi. Nobaba bangelo bamwi kujulu bakabija kapati. Bakasiya munzi wabo kujulu akuboola anyika. Sena ulizyi ncobakacitila boobo? Kutegwa basame mibili yabuntu akukwata bamakaintu.
Bangelo alimwi abamakaintu bakazyala bana. Bana aabo bakakomena kapati akuba basinguzu mpoonya bakaba basilunya. Bakali kuuma bantu. Jehova tanaakalekela kuti zintu eezyi zizumanane kucitika. Aboobo wakayeeya kuti abanyonyoone bantu babi aaba azambangulwe.
Pele kwakali muntu umwi iwakaindene abantu bamwi. Wakali kumuyanda Jehova. Izina lyakwe wakali Nowa. Wakalikwete alimwi wakalijisi abana botatwe, Semu, Hamu a Jafeti, boonse botatwe bakalikwete. Jehova wakaambila Nowa kuyaka bwato bupati, kutegwa walo amukwasyi wakwe bafwutuke ku Zambangulwe. Bwato oobo bwakali mbuli cibbokesi cipati icatakali kubbila mumaanzi. Alimwi Jehova wakaambila Nowa kuleta banyama banji akubanjizya mubwato kutegwa abalo bafwutuke.
Mpoonya-mpoonya Nowa wakatalika kuyaka bwato. Nowa amukwasyi wakwe bakatola myaka iili 50 kuyaka bwato. Bakayaka bwato mbubonya mbuli Jehova mbwaakabaambila. Aciindi eeco, Nowa wakacenjezya bantu kujatikizya Zambangulwe. Pele kunyina wakamuswiilila pe.
Mpoonya cakasika ciindi cakunjila mubwato. Atubone cakatobela.
“Mbubonya mazuba aa Nowa mbwaakabede, akwalo kubako kwa Mwanaamuntu mbokuyooba.”—Matayo 24:37
Andiza Inga Mwaakkomanina Ayaaya
ZIFWANIKISO IZIGWASYILIZYA BANA KWIIYA BBAIBBELE
Nowa Wakalijisi Lusyomo Muli Leza
Kwiinda mukugwasyigwa a Leza, Nowa wakayaka bwato kutegwa afwutule mukwasyi wakwe ku Zambangulwe. Ncinzi ncomukonzya kwiiya kujatikizya lusyomo muli Leza kuzwa kucibalo ca Nowa alimwi azambangulwe?
