Akasumi kakahika abantu bayeyongera kuba baingi omu nsi. Abarukukira obwingi bakaba bali babi. N’abamaraika abamu bakafoka babi. Bakaruga omu iguru nambere bakaba basemeriire kwikara, baija omu nsi. Omanyire habwaki barugireyo? Habwokuba bakaba nibagonza kusisana nk’abantu nukwo baswere abakazi.

Abamaraika banu bakaswera abakazi bazaara abaana. Abaana babo bakakura baine amaani maingi kukira ag’abantu aba buli kiro kandi bayenderezaaga abantu abandi. Yahwe akaba atasobora kuleka ebintu ebibi nka binu kwikaraho. Nahabweki akacwamu kuhwerekereza abantu ababi n’akozesa okusandaara kw’amaizi.

Baitu hakaba haroho omusaija ow’embaganiza ayagonzaga muno Yahwe. Ibara lye nuwe Nuha kandi akaba aine mukazi we n’abatabani basatu abarukwetwa Semu, Hamu, na Yafesi. Abatabani banu nabo bakaba baine abakazi. Yahwe akagambira Nuha kwombeka elyato likooto nukwo uwe n’eka ye bakire Okusandaara kw’Amaizi. Elyato likaba liri nka bokisi enkooto erukusobora kusereera ha maizi etadikiire. Yahwe akaragira Nuha okutahya ebisoro bingi omu lyato nukwo nabyo bitafera omu maizi.

Nuha akatandikiraho kwombeka elyato. Uwe n’eka ye bakamara haihi emyaka 50 nibombeka elyato linu. Bakalyombeka omu mulingo gwonyini nk’oku Yahwe akaba abaragiire. Omu kasumi ako, Nuha akagambira abantu nk’oku hakaba nihagenda kubaho Okusandaara kw’Amaizi. Baitu busaho muntu n’omu ayamuhuliriize.

Hanyuma, obwire bukahika obw’okutaaha omu lyato. Katurole ekyahondiireho.