Чер кырынга кижилер көвүдеп эгелээн. Оларның хөй кезии багай турган. Чамдык ангелдер безин каржы апарган. Олар дээрде бажыңын каапкаш, черже бадып келген. Чүге ынчанган деп бодаар сен? Олар кижи болуп хуулуп алгаш, черде херээжен улуска өглениксеп турган.

Ол ангелдерден херээжен улус оолдарлыг апарган. Олар өзүп келгеш, дыка күштүг апарып, кижилерни куду көрүп, коргудуп турган. Иегова ол бүгүнүң ынчаар уламчылаарын чөпшээревээн. Ынчангаш суг халавынга ол каржы кижилерни узуткаар дээн.

Ынчалза-даа Иеговага ынак Ной деп кижи өскелерден ылгалып турган. Ол кадайлыг база Сим, Хам, Иафет дээр үш оолдуг чораан. Ооң үш оглу база кадайларлыг турган. Ной болгаш ооң өг-бүлези суг халавын ажып эрте бээр кылдыр, Иегова оларга бажың-хемени тударын дааскан. Бажың-хеме дээрге суг кырынга салдап болур улуг хааржак-дыр. Оон ыңай Иегова дириг амытаннарны камгалаар дээш, оларны бажың-хемеже киирип алыр кылдыр, Нойга чугаалаан.

Ной өг-бүлези-биле бажың-хемени ол дораан тудуп кирипкен. Олар ону 50 хире чыл тутканнар. Олар бажың-хемени Иегованың чугаалааны ёзугаар тудуп алган. Ол үе дургузунда Ной улуска суг халавының дугайында чугаалап келген. Ынчалза-даа ону кым-даа дыңнаваан.

Ам бажың-хемеже кирер үе келген. Улаштыр чүү болганын көрүптээли.