Nuuvira okathi, yaahikhala atthu anceene mulaponi. Anamunceene yaari ootakhala. Hata malaikha makina a wiirimu yaahipakeya ootakhala. Awosa yaahikhuma wiirimu khurwa valaponi. Nyuwo munnisuwela nthowa naya? Yaaphavela okhala ntoko apinaatamu wira yaathele athiyana.

Malaikha awo ni axaaraya a opinaatamu yaahaayara anamwane. Anaaya yaahinnuwa vanceene, khukhala aikuru ni atthu ootepa woopiha. Awosa yanaahaaxa atthu. Yehova aahaana omaliha itthu iye soohiloka. Nto aahimpaka palano wira aapwetexe atthu ootakhala orumeelaka epula yuulupale.

Masi, aahikhala mulopwana mmosa oovirikana ni atthu akina. Owo aanimphenta Yehova. Nsina nawe naari Nowe. Owo aahikhalana mwaarawe ni anaawe araru: Semi, Khami ni Yafeti. Nave-tho anaawe yaahikhalana axaaraya. Yehova aahimuruma Nowe opaka ekalawa yuulupale wira owo ni emusi awe awerye woopowa okathi wa Mutaaseke. Ekalawa eyo yaari ntoko ekaaxa yuulupalexa yeetta vasulu va maasi. Yehova aahimuleela Nowe wira aakuxe axinama anceene ni aahele mukalawani wira yoopowe.

Moohipisa, Nowe aahipacerya opaka ekalawa. Nowe ni emusi awe yaahimaliha iyaakha 50 epakaka. Awo yaahipaka ekalawa ele ntoko yaarummwale aya ni Yehova. Nto okathi ole, Nowe aahaaleela atthu wira yaamurupa epula yuulupale. Masi khuuvo anwiriyanne.

Vano, waahiphiya okathi woovolowa mukalawani. Nrowe niwehe ele yaakhumelenle moottharelana.