Paglabay han panahon, nagdamu an tawo ha tuna. Kadam-an ha ira maraot. Bisan an pipira nga anghel ha langit nagin maraot. Ira ginbayaan an ira urukyan ha langit ngan linusad nganhi ha tuna. Maaram ka ba kon kay ano? Basi hira magkaada tawhanon nga lawas ngan makaasawa hin kababayin-an.

Ito nga mga anghel ngan an ira mga asawa nagkaada mga anak. An ira mga anak nagin magkusog gud ngan nagin mga bully. Ginraugdaog nira an mga tawo. Pero diri tutugotan ni Jehova nga magpadayon ini nga karaotan. Salit nagdesisyon hiya nga poohon an magraot nga tawo pinaagi hin baha.

Pero may usa nga tawo nga naiiba. Hinigugma niya hi Jehova. Hiya hi Noe. May asawa hiya ngan tulo nga anak nga lalaki nga hira Sem, Ham, ngan Japet. An iya mga anak may asawa liwat. Ginsugo ni Jehova hi Noe nga maghimo hin daku nga arka basi hiya ngan an iya pamilya matalwas ha Baha. An arka usa nga daku gud nga kahon nga nalutaw ha tubig. Ginsugo liwat ni Jehova hi Noe nga pasudlon ha arka an damu nga hayop basi liwat matalwas.

Nagtikang dayon hi Noe paghimo han arka. Umabot hin mga 50 ka tuig an iya paghimo hito upod han iya pamilya. Ira ginhimo ito uyon gud ha instruksyon ni Jehova. Durante hito nga panahon, ginpahamangnoan ni Noe an mga tawo mahitungod han Baha. Pero waray namati ha iya.

Inabot an takna nga kinahanglan na nira sumulod ha arka. Kitaon naton an sunod nga nahitabo.