Mkupita kwandaŵi, pacilambopa paliji ŵandu ŵajinji. Ŵajinji mwa jemanjajo ŵaliji ŵakusakala. Atamose malayika gane kwinani gaŵele gakusakala. Galesile malo gawo kwinani nikwika pacilambo capasi. Ana mkuganisya kuti gatesile yeleyo ligongo cici? Gasakaga kuwala yilu ya ŵandu kuti galombele acakongwe.

Malayikago ni acakongwewo ŵakwete ŵanace. Ŵanacewo paŵakulaga ŵaŵele ŵamacili nambosoni ŵandewo mwati ŵawulasyaga ŵandu. Yehofa nganakunda kuti yindu yeleyi yijendelecele kutendekwa. Ni jwalakwe jwaganisisye yakuti ajonanje ŵandu ŵakusakalawo pakamulicisya masengo cigumula ca mesi.

Nambope papali mundu jwine juŵatendaga yambone. Jwalakwe ŵamnonyelaga Yehofa. Lina lyakwe lyaliji Nowa. Jwalakwe ni ŵamkwakwe ŵakwete ŵanace ŵatatu ŵacalume. Mena gawo galiji Semu, Hamu, ni Yafeti. Ŵanaceŵa ŵakwetesoni aciŵamkwawo. Yehofa ŵamsalile Nowa kuti ataŵe combo cekulungwa kuti cakulupucilemo pandaŵi ja cigumula ca mesi. Combo cili libokosi lyekulungwa lyalikusajajaŵala pacanya pa mesi. Yehofa ŵamsalile Nowa kuti ajinjisye m’combomo yinyama yejinji kuti nombe nayo yikulupuce.

Mwangacelewa, Nowa ŵatandite masengo gakutaŵa combo cila. Jwalakwe ni liŵasa lyakwe ŵataŵile comboco kwa yaka ciŵandika 50. Ŵataŵile comboco mwakamulana ni yaŵasalile Yehofa. Pandaŵi jaŵataŵaga comboco jwalakwe ŵakalamusyagasoni ŵandu ya kwika kwa Cigumula, nambo pangali juŵampikanilaga.

Kaneko jakwanile ndaŵi jakuti ajinjile m’combo mula. Sambano kwende tulole yayatendekwe.