Ka máan kʼiineʼ yaʼabchaj máakoʼob way yóokʼol kaabeʼ. U maas yaʼabileʼ jach kʼasaʼanoʼob. Anchaj xan angeloʼob suunajoʼob kʼasaʼanil. Tu pʼatoʼob le kaʼan tuʼux kajaʼanoʼob kaʼachoʼ ka éemoʼob way Luʼumeʼ. ¿A wojel wa baʼaxten tu beetoʼob? Utiaʼal u sutkubaʼob bey wíinikeʼ yéetel u tsʼoʼokol u beeloʼob yéetel le koʼoleloʼoboʼ.

Le angeloʼoboʼ anchaj u paalal yéetel le koʼoleloʼoboʼ. Ka nuukchajoʼobeʼ jach anchaj u muukʼoʼob, jach kʼasaʼanoʼob yéetel tu beetoʼob loob tiʼ le máakoʼoboʼ. Jéeobaeʼ maʼ chéen tu yilaj le baʼax tu beetoʼoboʼ. Le oʼolal tu beetaj u búulul tuláakal yóokʼol kaab utiaʼal u xuʼulskoʼob.

Chéen baʼaleʼ anchaj juntúul máak maʼ jeʼex letiʼobeʼ. Letiʼeʼ u yaabiltmaj Jéeoba. U kʼaabaʼeʼ Noé, letiʼeʼ anchaj juntúul u yatan yéetel óoxtúul u paalal, u kʼaabaʼobeʼ, Sem, Cam yéetel Jafet. Cada juntúul tiʼ u paalaloʼobeʼ anchaj xan u yatan. Jéeobaeʼ tu yaʼalaj tiʼ Noé ka u beet junpʼéel arca. Lelaʼ bey jeʼex junpʼéel nojoch caja beetaʼan de cheʼeʼ yéetel jeʼel u páajtal u yetsʼtal yóokʼol le jaʼoʼ. Beyoʼ Noé yéetel u láakʼtsiloʼobeʼ yaan u salvarkubaʼob ken búuluk le máakoʼoboʼ. Tsʼoʼoleʼ Jéeobaeʼ tu yaʼalajtiʼ ka u yoks u jejeláas claseil baʼalcheʼob ichil le arcaoʼ utiaʼal xan maʼ u kíimloʼob.

Tu séebaʼanileʼ Noeeʼ tu káajsaj u beetik le arcaoʼ. Letiʼ yéetel u paalaleʼ óoliʼ 50 años xáanchaj táan u beetkoʼob. Tu beetoʼob jach jeʼex aʼalaʼabiktiʼob tumen Jéeobaoʼ. Teʼ kʼiinoʼob táan u beetik le arcaoʼ tu yaʼalaj xan tiʼ le máakoʼob táan u náatsʼal u kʼiinil u búulul tuláakal yóokʼol kaaboʼ, chéen baʼaleʼ mix máak creerte.

Ka túun kʼuch u kʼiinil u yokloʼob ichil le arcaoʼ. Koʼox ilik baʼax úuch ka tsʼoʼoki.