Masuk ma si Noak, keluargana, dohot angka binatang tu parau i. Ditutup Jahowa ma pintu ni parau i, dung i ro ma udan. Alani doras ni udan i, gabe ditutupi aek ma sude tano on jala mumbang ma parau i. Marmatean ma angka parjahat i. Alai, mangolu do si Noak dohot keluargana. Tontu las hian do roha ni nasida ala mangoloi Jahowa.

Saleleng 40 ari 40 borngin ro ma udan na doras. Dung i, so ma udan i jala lam moru ma aek i. Ujungna, so ma parau i di dolok-dolok. Alai, maraek dope tano i. Alani i, ndang pintor kaluar si Noak dohot keluargana sian parau i.

Lam leleng, lam koring ma tano i. Sataon lobi ma si Noak dohot keluargana di bagasan parau i. Dung i, didok Jahowa ma tu nasida asa kaluar sian i. Tingki kaluar nasida, ndang adong be na jahat. Mandok mauliate ma nasida tu Jahowa. Alani i, dibahen nasida ma persembahan tu Jahowa.

Las do roha ni Jahowa manjalo persembahan i. Marjanji ma Jahowa, ndang bahenonna be aek na sumar tu tano on. Dibahen Jahowa ma pelangi, tanda ni janjina i. Hea do diida ho pelangi?

Dung i, disuru Jahowa ma si Noak dohot keluargana asa marianakhon, asa lam godang jolma di portibi on.