REIREI 6
A Kamaiuaki Waniman ao A Rin n te Aonnaba ae Boou
A rin n te aake Noa ma ana utu ao maan. E kaina te mataroa Iehova ao e a moanna ni bwaka te karau. E rangi ni korakora te karau n te aro are e a moanna ni betirake te aake. N tokina, e a rabunaanako te aonnaba te ran. A bane ni mate aomata aika buakaka ake i tinanikun te aake. Ma a kamaiuaki Noa ma ana utu ake i nanon te aake. Ko kona n iangoa kukureia ngke a ongeaba iroun Iehova?
E bwaka ni korakora te karau i nanon 40 te ngaina ao 40 te bong, ao imwina e a toki. E tabe n ikinako te ran, ni karokoa ae e koro te aake i aoni maunga. Ma a aki kona Noa ma ana utu n otinako man te aake ngkekei naba, ibukina bwa bon iai naba te ran n taabo nako.
Teutana imwin teutana e a ikinako te ran ni karokoa ae ai bon akea. A boni kabanea teuana tabun te ririki i nanon te aake Noa ma ana utu. E tuangia Iehova imwina bwa a a kona n otinako nakon te aonnaba ae e a manga boou. A rangi ni kakaitau nakon Iehova ngke e kamaiuia, ao a kaotia n aroia n angakarea nakoina.
E kukurei Iehova n te karea aei. E berita bwa e na aki manga kamaunai bwaai ni kabane i aon te aba n te ieka. E karaoa nei wirara bwa e na moani kaoti i karawa bwa kanikinaean ana berita anne. Ko a tia n nonora nei wirara?
Imwin anne, e tuangaki Noa ma ana utu iroun Iehova bwa a na karikiia natiia ao ni kaona te aonnaba.
‘E rin Noa i nanon te aake, ao a aki muti [aomata] ni karokoa rokon te ieka n uotiia nako ni kabane.’—Mataio 24:38, 39