Ekerotushi Noé suluʼumüin tü anuwakat sümaa nüpüshi otta tü mürütkalüirua. Nüsürütka Jeʼwaa supuettoʼuse tü anuwakat, aʼita müsüjaʼa tü juyakat. Miyoʼushaata maʼin, ayaleraa, ayaleraa müsü tü anuwakat. Epirajaasü wüin tü mmapaʼakat. Outushii napüshuaʼa na mojulaashiikana. Akaisaʼa Noé sümaa nüpüshi katüsü noʼu suluʼu tü anuwakat. Talatakajasaʼa naya süka noonooin sümaa nünüiki Jeʼwaa, ¿aashimüin?

Waneepiasü tü juyakat soʼu 40 kaʼi jee 40 ai. Shiasaʼa mapa shiyüüʼülaaka jee shiyoolojoko tü wüinkat. Sütükaaka tü anuwakat saaʼu wanee uuchi. Süka nnojoluin maʼülaleein tü wüinkat, kakalia Noé suluʼu tü anuwakat sümaa nüpüshi.

Kakalia tü wüinkat süpüla shiyoolojuin. Alatüsü suulia wanee juya yalajachin Noé sümaa nüpüshi suluʼu tü anuwakat. Nümaka Jeʼwaa namüin nojuʼitajanain suluʼujee tü anuwakat, müshii nantakai aaʼin suluʼumüin wanee mma jeketü nojuʼitapa. Talatüshii maʼin naya süka katüin noʼu nutuma Jeʼwaa, naʼajaka mürüt nümüin Jeʼwaa.

Talatüshi maʼin Jeʼwaa sutuma tü naaʼinrakat. Nüpansaajaka namüin nnojoluinjatüin najaʼttirüin süchikuaʼa tü mmakat süka wanee juya miyoʼushaata. Niʼitaain wanee shiyaawase namüin, nujuʼitirüin wanee kasüpolüin chaa iipünaa. ¿Piʼrüirü wanee kasüpolüin chaa iipünaa?

Nüküjaka Jeʼwaa nümüin Noé sümaa nüpüshi kachoinjanain naya jee wainmainjanain naya sainküin tü Mmakat.