Noa, whẹndo etọn po kanlin lẹ po biọ aki lọ mẹ. Jehovah sú ohọ̀n lọ, bọ jikun bẹ. Jikun ja sọmọ bọ aki lọ fò to osin nukunmẹ. To godo mẹ, osin ṣinyọ́n aigba lọ pete ji. Mẹylankan he to gbonu aki lọ tọn lẹpo wẹ kú. Amọ́, Noa po whẹndo etọn po tin to hihọ́ glọ to aki lọ mẹ. Be a sọgan yí nukun homẹ tọn do pọ́n lehe homẹ yetọn na ko hùn do sọ dọ yé setonuna Jehovah ya?

Jikun ja na okle 40 po ozán 40 po, enẹgodo e doalọte. Osin lọ jẹ húhú ji vudevude. To godo mẹ, aki lọ glin do osó lẹ ji. Amọ́, osin gbẹ́ sù to filẹpo, enẹwutu Noa po whẹndo etọn po ma gán tọ́n sọn aki lọ mẹ to afọdopolọji.

Vudevude, osin lọ wá hú sẹ̀. Noa po whẹndo etọn po nọ aki lọ mẹ na owhe dopo linlán. Enẹgodo, Jehovah dọna yé dọ yé ni tọ́n sọn aki lọ mẹ bo biọ nuhe taidi aihọn yọyọ de mẹ. Yé dopẹna Jehovah dọ e whlẹn yé, bosọ do pinpẹn-nutọn- yinyọnẹn yetọn hia gbọn avọ́sinsan de bibasi hlan Jehovah dali.

Homẹ Jehovah tọn hùn do avọ́sinsan ehe go. E sọ dopà dọ emi ma na yí singigọ do và nulẹpo sudo to aigba ji gbede ba. Nado hẹn opagbe ehe lodo, e hẹn aidowhẹdo sọawuhia whla tintan to agahomẹ taidi ohia de. Be a ko mọ aidowhẹdo de pọ́n ya?

Enẹgodo, Jehovah dọna Noa po whẹndo etọn po dọ yé ni ji ovi lẹ bo gọ́ aigba ji.