Noa, neṱunḓu re novipuka va hita moskepi. Jehova wa pata omuvero, nombura ya uta okuroka tjinene ngandu oskepi tji ya uta okukayenda kombanda omeva. Korusenina ehi arihe re urire omeva. Ovandu avehe mba ri pendje yoskepi va ṱa. Nu Noa neṱunḓu re mba ri moskepi va yamwa. Ripura uriri kutja owo vari nondjoroka ndji ṱa pi kokutja va puratena ku Jehova?

Ombura ya roka oure womayuva 40 nomauṱuku 40, okuzambo ai zako. Kouṱiṱiṱiṱi omeva ya uta okuhenduruka. Nu oskepi ya kahaama kombanda yozondundu. Posi yokutja ngunda kwa ri omeva omengi kombanda yehi nu Noa neṱunḓu re kaave yenene okupita moskepi oruveze ndo.

Kouṱiṱiṱiṱi omeva ya ya pwira. Noa neṱunḓu re va kara moskepi oure wokombanda yombura imwe. Okuzambo Jehova we ve raera okupita moskepi nu ve hite mouye mu mu hari ourunde rukwao. Owo vari nondangi ku Jehova kutja we ve yama, nu ve mu tjitira ombunguhiro.

Jehova wa ri nondjoroka nombunguhiro ndjo. Eye we ve kwizikira kutja kamaa nyono oviṋa avihe kombanda yehi nomupupo rukwao. Otjotjiraisiro komakwizikiro nga, eye wa twapo outa wombura outenga meyuru. Ove wa rora okumuna outa wombura?

Okuzambo, Jehova wa raera Noa neṱunḓu re kutja ve panduke ovanatje nu ve urise ehi.