Simrek ni Noe, ti pamiliana, ken dagiti animal iti daong. Inserra ni Jehova ti ridaw ket nangrugi a nagtudo. Gapu ta nakapigpigsa ti tudo, naglayus ket timpaw ti daong. Ngimmato a ngimmato ti danum agingga nga awanen ti daga a makita. Nalmes dagiti dakes a tattao nga adda iti ruar ti daong. Ngem sibibiag da Noe ken ti pamiliana iti uneg ti daong. Mapanunotmo kadi no kasanoda karagsak ta nagtulnogda ken Jehova?

Nagtudo iti 40 nga aldaw ken 40 a rabii. Idi nagsardengen, in-inut a bimmaba ti danum. Nagdisso ti daong iti bantay. Ngem nangato pay ti danum isu a saan pay a makaruar ni Noe ken ti pamiliana.

In-inut a nagmaga ti daga. Nasurok a makatawen a naggigian da Noe ken ti pamiliana iti uneg ti daong. Idi kuan, imbaga ni Jehova kadakuada a rummuardan ket agyanda iti lubong nga awanen ti dakes a tao. Agyamyamanda unay ken Jehova ta insalakanna ida isu a nagdatonda kenkuana.

Naragsakan ni Jehova iti datonda. Inkarina a dinanton pulos paglayusen ti daga tapno madadael ti amin nga adda iti dayta. Kas pagilasinan iti karina, pinagparangna ti kaunaan a bullalayaw (rainbow). Nakakitaka kadin iti bullalayaw?

Imbaga met ni Jehova ken Noe ken iti pamiliana nga aganakda ket punnuenda ti daga.