Noa, shi a nta masha ni hte dusat dumyeng ni gaw sanghpaw li kata de shang wa ai. Yehowa gaw chying hka hpe pat kau ai. Dai hpang marang htu wa ai. Marang grai kaba ai majaw, sanghpaw li gaw hka ntsa hta waw wa ai. Hpang jahtum hta mungkan ting hka lim mat ai. Sanghpaw li shinggan hta nga ai, n hkru n kaja ai masha yawng gaw si mat ai. Raitim, kata hta nga ai Noa hte shi nta masha ni gaw asak lawt ma ai. Shanhte Yehowa a ga madat ai majaw kade daram pyaw na hpe shingran yu u?

Marang gaw shani 40 ya, shana 40 na tup grai kaba hkra htu ngut ai hpang hkring mat ai. Hka mung angwi ngwi yawm wa ai. Hpang jahtum, sanghpaw li gaw bum ntsa hta mara mat ai. Raitim, shara shagu hta hka grai naw law nga ai majaw, Noa hte shi a nta masha ni gaw shinggan de n mai pru shi ai.

Angwi ngwi hte hka mung hkyet mat wa ai. Noa hte shi nta masha ni sanghpaw li kata hta arau nga ai gaw laning mi jan sai. Dai hpang, n hkru ai masha ni hpe yeng seng kau sai mungkan re ai sanghpaw li shinggan de mai pru sai ngu Yehowa tsun ai. Shanhte asak lawt wa ai majaw Yehowa hpe grai chyeju dum ai. Dai hpe hkungga nawng nna madun wa ai.

Dai zawn hkungga nawng ai hpe Yehowa ra sharawng ai. Mungkan ga hpe htawm hpang hta hka sha-u ing ai hku nna, n jahten sai ngu ga sadi jaw ai. Ga sadi a masat dingsat hku nna lamu ntsa hta shawng nnan na n-goi la tum hpe galaw ya ai. N-goi la tum hpe nang mu ga ai i?

Dai hpang Yehowa gaw Noa hte shi a nta masha ni hpe kashu kasha shaprat nna mungkan ting hpring hkra galaw na matu tsun ai.