Nué entra na arka djuntu ku se família i kes animal. Jeová fitxa pórta i txuba kumesa ta kai. Txobe tantu txeu ki arka kumesa ta boia riba di agu. Téra interu fika xeiu di agu. Tudu kes algen mau ki staba fóra di arka móre. Má Nué ku se família staba salvu déntu di arka. Bu ta konsigi imajina modi ki es staba kontenti pamodi es obi ku Jeová?

Txobe 40 dia ku 40 noti i dipôs para. Agu ba ta dixi poku-poku ti ki arka para riba di un monti. Má Nué ku se família ka podia saíba di arka pamodi inda staba txeu agu pa tudu lugar.

Agu ba ta seka poku-poku. Nué ku se família pasa más di un anu déntu di kel arka. Dipôs Jeová fla-s pa es pode sai di arka. Ka tinha ningen mau más. Nué ku se família fika txeu kontenti pamodi Jeová salva-s. Pur isu, es faze un oférta pa Jeová.

Jeová fika kontenti ku kel oférta. El promete ma nunka más el ka ta distruíba mundu ku un dilúviu. Kómu sinal di se promésa el poi ta parse primeru arkuíris. Dja bu kustuma odja un arkuíris?

Tanbê Jeová fla Nué ku se família pa ten fidjus i pa intxi Téra.