Laj Noe, li xjunkabʼal ut ebʼ li xul keʼok saʼ li jukubʼ kabʼl. Li Jehobʼa kixtzʼap li okebʼaal, ut kichalk li habʼ. Kʼajoʼ li haʼ kixkʼe joʼkan naq li jukubʼ kabʼl kitaqeʼk saʼ xbʼeen li haʼ. Timil timil, chixjunil li chʼochʼ kimuqunk chi haʼ. Chixjunilebʼ li maaʼusebʼ xnaʼlebʼ keʼkanaak chirix kabʼl ut keʼkamk. Abʼan laj Noe ut li xjunkabʼal maakʼaʼ xeʼxkʼul xbʼaan naq wankebʼ saʼ li jukubʼ kabʼl. Kʼajoʼ tana xeʼsahoʼk saʼ xchʼool naq xeʼabʼink chiru li Jehobʼa!

Kʼajoʼ xkawil li habʼ kixkʼe chiru 40 kutan ut 40 qʼoqyink, tojaʼ naq kixaqliik. Saʼ xnumik ru li kutan, kikubʼeek roq li haʼ. Ut chirix chik aʼan, li jukubʼ kikanaak saʼ xbʼeen jun li kʼicheʼ. Abʼan saʼ xkʼabʼaʼ naq toj maajiʼ nakubʼeek chiʼus li haʼ, laj Noe ut li xjunkabʼal toj keʼkanaak saʼ li jukubʼ kabʼl.

Ebʼ li kutan keʼok chi numeʼk ut li haʼ kiʼok chi chaqik. Chi joʼkan, kixqʼax jun chihabʼ xwanjik laj Noe ut li xjunkabʼal saʼ li jukubʼ kabʼl. Tojaʼ naq li Jehobʼa kixye rehebʼ naq teʼelq chaq. Chanchan naq akʼ chik chixjunil! Kʼajoʼ xeʼxbʼanyoxi re li Jehobʼa naq kixkolebʼ, joʼkan naq keʼmayejak chiru.

Li Jehobʼa kiwulak chiru li mayej aʼin, ut kixkʼe li raatin rehebʼ naq maajunwa chik tixsach rikʼin jun chik li Bʼutʼihaʼ li xyobʼtesihom arin saʼ Ruuchichʼochʼ. Choʼq reetalil li raatin, kixkʼut xbʼeen sut saʼ choxa jun li xoqiqʼabʼ. Ma ak aawilom jun li xoqiqʼabʼ?

Li Jehobʼa kixye ajwiʼ re laj Noe ut li xjunkabʼal naq teʼwanq xkokʼal ut teʼxnujobʼresi li Ruuchichʼochʼ.