មេរៀនទី៦
មនុស្ស៨នាក់បានរួចជីវិត
ណូអេ ក្រុមគ្រួសាររបស់គាត់ និងសត្វបានចូលទៅក្នុងទូកធំ។ រួចមក ព្រះយេហូវ៉ាបិទទ្វារទូក ហើយភ្លៀងក៏ចាប់ផ្ដើមធ្លាក់។ ភ្លៀងធ្លាក់ខ្លាំងណាស់ រហូតដល់ទូកអណ្ដែតលើផ្ទៃទឹក។ យូរៗទៅ ទឹកបានជន់លិចពិភពលោកទាំងមូល។ នៅខាងក្រៅទូក មនុស្សអាក្រក់ទាំងអស់បានស្លាប់។ ប៉ុន្តែ នៅក្នុងទូកវិញ ណូអេនិងក្រុមគ្រួសាររបស់គាត់មានសុវត្ថិភាព។ សូមស្រមៃគិតទៅមើលថា ពួកគាត់សប្បាយចិត្តខ្លាំងយ៉ាងណា ដែលបានស្ដាប់បង្គាប់ព្រះយេហូវ៉ា!
បន្ទាប់ពីធ្លាក់ភ្លៀងខ្លាំងអស់៤០ថ្ងៃ៤០យប់ មេឃក៏ឈប់ភ្លៀង។ រួចទឹកបានស្រកបន្តិចម្ដងៗ។ ក្រោយមក ទូកបានកឿងនៅលើភ្នំមួយ។ ប៉ុន្តែ នៅតែមានទឹកគ្រប់កន្លែងនៅឡើយ។ ហេតុនេះ ណូអេនិងក្រុមគ្រួសារមិនអាចចេញពីទូកភ្លាមៗបានទេ។
បន្តិចម្ដងៗទឹកក៏ស្រកអស់ រហូតដល់ស្ងួតដី។ បន្ទាប់មក ព្រះយេហូវ៉ាបានប្រាប់ណូអេនិងក្រុមគ្រួសារគាត់ឲ្យចេញពីទូកធំ។ ពួកគាត់នៅក្នុងទូកធំអស់ជាងមួយឆ្នាំហើយ។ ឥឡូវនេះ នៅខាងក្រៅគឺជាពិភពលោកដែលគ្មានមនុស្សអាក្រក់។ ណូអេនិងក្រុមគ្រួសារដឹងគុណព្រះយេហូវ៉ាខ្លាំងណាស់ ដែលបានសង្គ្រោះជីវិតពួកគាត់។ ដូច្នេះ ពួកគាត់បានជូនគ្រឿងបូជាដល់ព្រះយេហូវ៉ា។
ព្រះយេហូវ៉ាពេញចិត្តគ្រឿងបូជារបស់ពួកគាត់។ លោកសន្យាថានឹងមិនបំផ្លាញអ្វីៗទាំងអស់នៅផែនដីដោយទឹកជំនន់ទៀតឡើយ។ ម្ល៉ោះហើយ លោកបានធ្វើឲ្យមានឥន្ទធនូជាលើកដំបូងនៅលើមេឃ ដើម្បីបញ្ជាក់អំពីពាក្យសន្យារបស់លោក។ តើអ្នកធ្លាប់ឃើញឥន្ទធនូទេ?
បន្ទាប់មក ព្រះយេហូវ៉ាបានប្រាប់ណូអេ និងក្រុមគ្រួសាររបស់គាត់ឲ្យមានកូនជាច្រើន និងឲ្យមានពេញពាសលើផែនដី។
«ណូអេចូលទៅក្នុងទូកធំនោះ ហើយ[មនុស្ស]មិនបានយកចិត្តទុកដាក់សោះ រហូតដល់ទឹកជន់ឡើង កញ្ឆក់យកគេទាំងអស់គ្នាទៅ។—ម៉ាថាយ ២៤:៣៨, ៣៩
