Noué ni muiji uê ni iama a bokona mu álaka. Jihova ua jika o dibhitu, mu kienhiki kua mateka o kunoka. Kua noko luavulu, o ixi ioso iezalele ni menha o álaka ia kexile ku thandu dia menha. Athu oso aiibha akexile bhu kanga dia álaka afú. Maji Noué ni muiji uê moxi dia álaka a bhuluka. U tena kuxinganeka o kisangusangu kia kexile na-kiu mukonda dia kubelesela Jihova?

Kua noko 40 a Izuua ni 40 a usuku. Bhofele-bhofele o menha akexile mu sosoloka. O álaka anga imana ku thandu dia mulundu. O ixi ioso iezalele hanji ni menha, kiki kia bhangesa Noué ni muiji uê kukala mu álaka izuua iavulu.

Bhofele-bhofele, o menha oso a kukuta mu ixi. Noué ni muiji uê akexile m’oxi ia álaka muvu umoxi ndenge. Mu kusuka-ku Jihova ua tumina kutunda mu álaka. Mu ixi ioso o kuiibha ni usuéia kua bhuile. Mu kienhiki o ixi ioso iexile kala mundu ua ubhe. Ene a sangulukile kiavulu mukonda Jihova ua a bhulula. Mukonda dia kiki, a bhana ujitu kua Jihova, ua difuanganene ni ua bhanene Abele.

Kiki kia sangulukisa Jihova. Muene ua kanena kuila nuka dingi ueji buikisa o ima ioso mu ixi ni dilúviu dionene. Phala ene kulembalala o polomesa íii Jihova ua bhangesa kumoneka o hongolo ia dianga. O kuila eie ua muene kiá hongolo? Kioso ki u mona hongolo ku diulu, lembalala o kikanenu kia Jihova.

Jihova uambela Noué ni muiji uê phala a vuale ni kuizalesa o ixi ni tuana tuâ.