တၢ်မၤလိ ၆
ပှၤဃိးဂၤပူၤဖျဲးအဂ့ၢ်
စီၤနိအၤ, အဟံၣ်ဖိဃီဖိဒီး ဆၣ်ဖိကီၢ်ဖိတဖၣ် လဲၤနုာ်လီၤဝဲလၢ ကဘီအပူၤလီၤ. ယဟိဝၤယွၤ ကးတံာ်ဃာ်ပဲတရီ ဒီးမူခိၣ်စးထီၣ်စူၤလီၤဝဲလီၤ. တၢ်စူၤလီၤဖးဒိၣ်အဃိ ကဘီစးထီၣ်ထီၣ်ဖီလၢ ထံအဖီခိၣ်လီၤ. လၢခံန့ၣ် ထံလုၢ်ဘၢဝဲ ဟီၣ်ခိၣ်ဒီဘ့ၣ်ညါ. ဒီးလၢကဘီအချၢန့ၣ် ပှၤအၢပှၤသီသံကွံာ်ဝဲခဲလၢာ်လီၤ. ဘၣ်ဆၣ် စီၤနိအၤဒီးအဟံၣ်ဖိဃီဖိ အိၣ်လၢကဘီပူၤအဃိ ပူၤဖျဲးဝဲလီၤ. မ့ၢ်လၢစီၤနိအၤဒီး အဟံၣ်ဖိဃီဖိ ဒိကနၣ်ယဟိဝၤယွၤ အကလုၢ်အဃိ အဝဲသ့ၣ်ပူၤဖျဲးဝဲလီၤ. ဒီးအဝဲသ့ၣ် ကပှဲၤဝဲဒီးတၢ်သူၣ်ခုသးခုလီၤ.
မူခိၣ်စူၤလီၤဝဲ အနံၤ ၄၀ ဒီးအနၤ ၄၀ လီၤ. ဖဲမူခိၣ်စူၤပတုာ်ကွံာ်အလီၢ်ခံန့ၣ် ထံလီၤသံးကွံာ်ဝဲ ကယီကယီလီၤ. ဒီးလၢခံန့ၣ် ကဘီအိၣ်ကတီၢ်ဝဲလၢ ကစၢၢ်ခိၣ်လီၤ. ဘၣ်ဆၣ် ထံအိၣ်တ့ၢ်ဒံးဝဲလၢ တၢ်လီၢ်ကိးပူၤဒဲးလီၤ. လၢတၢ်န့ၣ်အဃိ စီၤနိအၤဒီးအဟံၣ်ဖိဃီဖိန့ၣ် ဟးထီၣ်လၢကဘီအချၢ တသ့ဒံးဘၣ်.
စီၤနိအၤဒီးအဟံၣ်ဖိဃီဖိ ဘၣ်အိၣ်ဝဲလၢကဘီအပူၤ ယံာ်ဝဲတနံၣ်ဘျဲၣ်လီၤ. ထံလီၤသံးကွံာ်ဝဲ ကယီကယီ တုၤလီၤလၢ ယဟိဝၤယွၤတဲဘၣ်အဝဲသ့ၣ်လၢ သုဟးထီၣ်လၢကဘီချၢသ့လံ. ဖဲစီၤနိအၤဒီး အဟံၣ်ဖိဃီဖိဟးထီၣ်လၢ ကဘီချၢအခါ အဝဲသ့ၣ်တထံၣ်ဘၣ် တၢ်အၢတၢ်သီဒ်သိးလၢညါလၢၤဘၣ်. ခီဖျိလၢယဟိဝၤယွၤမၤပူၤဖျဲးအဝဲသ့ၣ်အဃိ စီၤနိအၤဒီးအဟံၣ်ဖိဃီဖိ စံးဘျုးစံးဖှိၣ်က့ၤယဟိဝၤယွၤဒီး ဟ့ၣ်လုၢ်ထီၣ်တၢ်ဆူအအိၣ်လီၤ.
ယဟိဝၤယွၤဘၣ်သူၣ်ဘၣ်သးဝဲ အဝဲသ့ၣ်အတၢ်ဟ့ၣ်လုၢ်ထီၣ်အံၤလီၤ. ကစၢ်ယွၤအၢၣ်လီၤဝဲလၢ အတမၤဟးဂီၤကယဲၢ်တၢ်အိၣ်လၢ ဟီၣ်ခိၣ်ချၢလၢထံလၢၤဘၣ်. ဝံၤဒီးကစၢ်ယွၤမၤဖျါထီၣ်ဝဲ တၢၢ်ကွဲၤလၢ မူခိၣ်အဆိကတၢၢ်တဘျီန့ၣ်လီၤ. ဒီးတၢၢ်ကွဲၤန့ၣ် မ့ၢ်ဝဲတၢ်ပနီၣ်တခါလၢ ယွၤအတၢ်အၢၣ်လီၤအီလီၤအဂီၢ်လီၤ. မ့ၢ်နထံၣ်ဘၣ်တၢၢ်ကွဲၤ တဘျီဘျီဧါ.
ဝံၤဒီး ယဟိဝၤယွၤတဲဘၣ်စီၤနိအၤဒီး အဟံၣ်ဖိဃီဖိလၢ အဝဲသ့ၣ်ကဘၣ်မၤပှဲၤထီၣ် ဟီၣ်ခိၣ်ဒီဘ့ၣ်လၢအဖိအလံၤလီၤ.
“စီၤနိအၤလဲၤနုာ်လၢကဘီပူၤ, ဒီး [ပှၤဂၤ] တသ့ၣ်ညါဘၣ် တုၤလီၤလၢ ထံလုၣ်ဘၢတၢ်ဟဲ” လီၤ.—မးသဲ ၂၄:၃၈, ၃၉