Noa ne bena mu dîku diende ne nyama bakabuela mu buatu. Yehowa wakakanga tshiibi, ne mvula wakatuadija kuloka. Mvula wakaloka wa bungi, buatu kutuadijabu kulelema pa mâyi. Kuenzekabi ne: mâyi abuikile buloba bujima. Bantu babi bonso bavua pambelu pa buatu bakafua. Kadi Noa ne bena mu dîku diende bavua mu bukubi munda mua buatu. Udiku mua kufuanyikija disanka divuabu nadi bua muvuabu batumikile Yehowa anyi?

Mvula wakaloka matuku 40, munya ne butuku, pashishe kukamaye. Mâyi akapueka ku kakese ku kakese. Ndekelu wa bionso, buatu buakasomba pa mikuna. Kadi kutshivua mâyi a bungi miaba yonso, ke bualu kayi Noa ne bena mu dîku diende kabavua mua kupatuka mu buatu diakamue to.

Mâyi akatuadija kuuma ku kakese ku kakese. Noa ne bena mu dîku diende bakashala bonso mu buatu tshidimu tshijima ne tshitupa. Pashishe Yehowa wakabambila bua kupatuka mu buatu ne kusomba pa buloba pavua kapayi kabidi bantu babi. Bavua ne dianyisha dia bungi kudi Yehowa bua muvuaye mubapandishe, ne bakaleja dianyisha diabu pakalambulabu Yehowa mulambu.

Yehowa wakanyisha mulambu wabu au. Wakalaya ne: kavua mua kubutula kabidi tshintu tshionso tshivua pa buloba ku mvula wa bungi to. Wakapatula muanza nkongolo wa kumpala mu diulu bu tshimanyinu tshia mulayi au. Ukadiku mumone muanza nkongolo anyi?

Pashishe Yehowa wakambila Noa ne bena mu dîku diende bua balele bana ne buwuje buloba.