Nowa, chisaka chindi nianyama eñilili muwatu. Yehova washinkili kuchiisu nawa nvula yatachikili kunoka. Yanokeli nankashi chakwila watu watachikili kulela. Nkumininaku, heseki hejima henzeli menji. Antu ejima adiña nayilwilu yatama abulili kwiñila muwatu afwili. Ilaña Nowa nichisaka chindi afwili wanyi chineli adiña muwatu. Azañaleli nankashi muloña amwovwahilili Yehova.

Nvula yanokeli hadi mafuku 40 mwaana niwufuku, kuhiñahu yaketukili. Menji atachikili kuuma chovu-chovu. Nkumininaku, watu washakamini hamapidi. Hela chochu, menji achidiña amavulu kwejima, dichi Nowa nichisaka chindi hiyatwesheli kufuma muwatu hohenohuku.

Chovu-chovu, menji enjili nakuuma. Nowa nichisaka chindi ashakamini muwatu kubadika hadi chaaka chimu. Yehova wayilejeli nindi ediki muwatu nakwiñila mwituña dadiña neyi kaayi kakaha. Amusakilili Yehova chayipulwishiliyi nawa amwekesheli iku kusakilila kuhitila mukumulambula Yehova mulambu.

Yehova wazañaleli naniwu mulambu. Washiikili nindi hakajilumunahu cheñi yuma yejima hamaseki nadibajiku. Wakolesheli ichi chikaninu kuhitila mukumwekesha kansuluñunda katachi mwiwulu. Wakimonahu dehi kansuluñunda?

Kufumahu Yehova wamulejeli Nowa nichisaka chindi kuvwala anyana nakwinzesha iseki.