Noa nodonjo e yie kaachiel gi joode kod le bende. Jehova noloro dhood yie, kendo koth ne ochako chue. Kodhno nochue mang’eny, ma kata mana yie maduong’no nochako lewore e wi pi. Pi noumo piny duto. Joma ne ok odonjo e yie notho te. Noa gi joode to ne otony e i yie. Donge nyaka bed ni ne gimor ahinya ni ne giluwo kaka Jehova nochikogi?

Koth nochue ma ok chogi kuom ndalo 40, odiechieng’ gi otieno. Mosmos, pi nochako duono. Gikone, yie ne ochung’ e wi gode. Kata kamano, pi pod ne ni kamoro amora, omiyo Noa gi joode ne pod ok nyal wuok oko.

Mosmos, pi noduono te. Kae to Jehova ne onyisogi ni koro ne ginyalo wuok e yie. Ne gichalo joma odonjo e piny manyien. Ne gigoyo ne Jehova erokamano nikech noresogi, kendo ne gichiwone misango. Kinde ma Noa gi joode nokawo e yie koriw te ne en higa achiel gi bathe.

Jehova ne omor ahinya gi misango ma ne gichiwono. Nosingo ni ok nochak oketh gik manie piny kotiyo gi pi. Mondo opar ne dhano singono, Jehova noketo ndanya kata lihudu e kor polo. Be iseganeno ndanya kata lihudu?

Jehova nonyiso Noa gi joode ni ginyuolre gipong’ piny.