Noé mëdë fyamilyë etsë jëyujk animal ojts tyëkëdë mä ja arkë. Ta Jyobaa dyaˈˈadujky ja tëjkˈääw ets myiinyë komduu. Jantsy kom tyuuy axtë ja arkë kyënaanëˈky. Wanaty wanaty ja nëë pyejty axtë ko ja naxwinyëdë nyipaˈtstääy ets niˈamukë ja axëkjäˈäy yˈoˈktë. Perë Noé mëdë fyamilyë kyaj wiˈix jyäjttë mët ko të nety tyëkëdë mä ja arkë. ¿Mbawinmaapy wiˈix jantsy jotkujk nyayjäˈäwëdë ko tmëmëdoowdë Jyobaa?

Jantsy kom tyuuy 40 xyëëw 40 tsyuˈum, ok, ta tyuunäjxy. Ko ja tiempë nyajxy, ta ja nëë wanaty wanaty jyënajky. Ets ok, ta ja arkë nyaxkëdaky mä tuˈugë kopk. Per kom kyajnëmë nety ja nax nyitëtstuˈuty, ta Noé mëdë fyamilyë yˈakˈijttë tuk tiempë mä ja arkë.

Ko nyajxy kanäk xëëw, ta ja nax nyitëtstuty. Etsë Noé mëdë fyamilyë, jaa yˈijttë naa tuk jëmëjt naxy mä ja arkë. Ta netë Jyobaa yˈanmääyëdë ko mbäät pyëtsëmdë. ¡Duˈunë nety kyëxëˈëky extëm ja jembyë naxwinyëdë! Mëjwiin kajaa tmëjjäˈäwëdë ko Jyobaa yajnitsokëdë, pääty tmooytyë tuˈugë wintsëˈkën.

Jyobaa tyukjotkëdakë tyäˈädë wintsëˈkën, ets wyandak ko ninäˈä jatëgok tkayajkutëgoyaˈany mëdë komduu tukëˈëyë tijaty jaˈäjtp yä naxwiiny. Pääty tpëjtaky tuˈugë ijxwëˈëmën parë yajjamyatsët diˈib wyandak, ko dyajpëtsëëmy ja tim jawyiimbë iˈtsy. ¿Të xyˈokˈijxpë tuˈugë iˈtsy?

Jyobaa ojts tˈanëëmë Noé mëdë fyamilyë parë tmëdattëdë yˈuˈunk yˈënäˈk ets dyajwinduktëdë naxwinyëdë.