Ta̱ Noé xíʼin na̱ veʼera ni̱ki̱ʼvina ini tú arca ta saátu ku̱a̱ʼání kití. Tándi̱ʼi nda̱si Jehová yéʼé tú arca ta ki̱xaʼá kóonní sa̱vi̱. Ta nda̱kunúunú nu̱ú ti̱kui̱í xa̱ʼa ña̱ ndeéní ko̱onra, ta nda̱kutúra iníísaá nu̱ú ñuʼú. Ndiʼi na̱ yiví na̱ kǒo ñúʼu ini tú arca ni̱xi̱ʼi̱vana, soo ta̱ Noé xíʼin na̱ veʼera kǒo ña̱ níndoʼona xa̱ʼa ña̱ ñúʼuna ini tú arca. Ni̱kusi̱íní-inina xa̱ʼa ña̱ ka̱ndíxana Ndióxi̱ ta va̱ása níxi̱ʼi̱na.

Ki̱ʼva 40 ki̱vi̱ xíʼin 40 ñu̱ú ko̱on sa̱vi̱, tá xa̱a̱ ku̱a̱ʼá ki̱vi̱ ni̱ya̱ʼa saáví ki̱xaʼá ni̱yichi̱rá. Tándi̱ʼi ni̱xa̱a̱ tú arca xi̱kununú nu̱ú iin xi̱kí. Soo xa̱ʼa ña̱ ku̱a̱ʼání ti̱kui̱í xi̱ndika̱a̱ ku̱a̱ʼá tiempo xi̱ñuʼuna ini tú arca yóʼo.

Ku̱a̱ʼá ki̱vi̱ ni̱ya̱ʼa ta saáví ki̱xaʼá yíchi̱ va̱ʼa ti̱kui̱í. Ta̱ Noé xíʼin na̱ veʼera ki̱ʼva iin ku̱i̱ya̱ xi̱ñuʼuna ini tú arca. Tasaá ni̱ka̱ʼa̱n Jehová xíʼinna ña̱ kivi keena. Tá ke̱ena kǒoka na̱ yiví na̱ kéʼé ña̱ va̱ása va̱ʼa íyo. Ni̱kusi̱íní-inina ta ta̱xina iin kití ndaʼa̱ Ndióxi̱ xa̱ʼa ña̱ sa̱kákura miína.

¿Á ku̱tóo Jehová ña̱ʼa ña̱ ta̱xina ndaʼa̱ra? Ku̱tóovaraña. Xa̱ʼa ña̱yóʼo ni̱ka̱ʼa̱nra xíʼinna ña̱ kǒo sandiʼi-xa̱ʼakara na̱ yiví xíʼin sa̱vi̱ kini. Ña̱ va̱ʼa ná kǒo nandósó-inina xa̱ʼa ña̱yóʼo ni̱na̱ʼa̱ra iin arcoíris nu̱úna. ¿Á xa̱a̱ xíniún iin arcoíris sava yichi̱?

Tasaá ni̱ka̱ʼa̱n Jehová xíʼinna ña̱ koo ku̱a̱ʼá se̱ʼena ta sakutúna iníísaá nu̱ú ñuʼú yóʼo.