Noé, ichampoyouaj uan tlapialmej kalajkej ipan akali. Jehová kitsajki nopa akali, uan teipa pejki tlaauetsi. Uetski tlauel miak atl uan nopa akali pejki nemi aixko. Nopa atl momiakilijtiajki, uan teipa, ipan nochi Tlaltipaktli tlatemik. Nochi maseualmej katli amo kualmej mijkej pampa amo kalajkej ipan akali. Uan Noé ininuaya ichampoyouaj momanauijkej pampa itstoyaj ipan akali. ¿Timoiljuia yolpaktoyaj pampa kineltokatoyaj Jehová?

Chikauak uetski atl 40 tonali uan 40 youali. Teipa, kema ayokmo tlaauetski, nopa atl temotiajki. Uan maske nopa akali kuatakantikisato tepeixko, Noé uan ichampoyouaj amo nimantsi kiskej pampa kalteno nojua onkayaya miak atl.

Yolik nopa atl nojua temotiajki. Noé uan ichampoyouaj itstoyaj ipan akali kipano se xiuitl. Uajka Jehová kiniljuik ma kisakaj. ¡Nesiyaya kej se yankuik Tlaltipaktli! Tlauel kitlaskamatiliyayaj Jehová pampa kinmanauijtoya, yeka kimakakej se tlakajkaualistli.

Jehová tlauel kipaktik nopa tlakajkaualistli, uan kiniljuik ayokmo kema kintsontlamiltiskia maseualmej ika atl. ToTeotsij kichijki ma monexti se akosamalotl, kiampa kiilnamikiskiaj tlen kintenkauilijtoya. ¿Tikitstok se akosamalotl?

Nojkia, Jehová kinnauatik ma kinpiakaj ininkoneuaj uan ma kitemitikaj Tlaltipaktli.