UNowa lemuli yakhe bangena emkhunjini lezinyamazana. UJehova wavala umnyango, izulu laseliqalisa ukuna. Lana kakhulu umkhumbi waze waqalisa ukundenda. Umhlaba wonke wavalwa ngamanzi. Abantu bonke abangangenanga emkhunjini babulawa ngamanzi. Kodwa uNowa lemuli yakhe abazange bafe. Bathaba kakhulu ngoba babelalele uJehova.

Izulu lana okwamalanga angu-40 lobusuku obungu-40 laselisima. Amanzi aqalisa ukwehla kancane kancane. Umkhumbi wafika wahlala phezu kwezintaba. Amanzi ayelokhu egcwele indawo yonke, yikho uNowa lemuli yakhe babengeke baphume emkhunjini.

Amanzi ayelokhu ephela kancane kancane. UNowa lemuli yakhe babehlale emkhunjini okwesikhathi esedlula umnyaka. UJehova wasebatshela ukuthi baphume emkhunjini. Bathaba kakhulu ngoba uJehova wayebasindisile, yikho benza umnikelo ukuze batshengise ukuthi bayambonga.

UJehova wawuthanda umnikelo lo. Wathembisa ukuthi wayengasoze aphinde abhubhise izinto ezisemhlabeni ngamanzi. Wenza kwaba lomchilo wamakhosikazi ukuze aqinisekise abantu ukuthi wayezasigcina isithembiso ayesenzile. Uyake uwubone yini umchilo wamakhosikazi?

UJehova wasetshela uNowa lemuli yakhe ukuthi babe labantwana futhi bagcwalise umhlaba.