Nowa, no mbhuri yake pomwe no zvinyama vakanghwina mu arka. Jehovha wakafunga musuvo zve nvhura yakatanga kuna. Yakanisisa zvokuti arka yakatanga kutumbaira. Kumwa yakaboboja pasi pese. Vandhu vese vakashata vainga kunja ko arka vakapera kufa. Asi Nowa no mbhuri yake vakapona ngokuti vainga mu arka. Mungakwanisa kurangarira mudakaro wo vakava nawo ngo kuva vanozwira Jehovha?

Nvhura yakana 40 o njiku usiku no masikati, perapo yakazogaramuka. Padoko ngo padoko kumwa yakatanga kuphwa. Pakupejisira, arka yakaceva pa ndundhu. Asi zvecivoneka kuti ndau zinji jainga jicino kumwa, Nowa no mbhuri yake avazivi kukwanisa kubuda mu arka.

Padoko ngo padoko, kwakatanga kuoma. Nowa no mbhuri yake, vainga pamwepo mukati mo arka, vopeja gore rimwe varimo. Ngo kudaro Jehovha wakavabvuja kuti vabude kunja ko arka kwaiita inga nyika imbza. Ivona vakabongesera maningi Jehovha ngo kuvaponesa zve vakazvitatija ngo kuita mupiro kuna Jehovha.

Jehovha wakadakara maningi ngo mupiro wondhowo. Iyena wakagondesa kuti aazoparajizve ciri cese pasi pano ngo ndambi. Inga citatijo co cigondiso condhoco, iyena wakaita murarabungu kana uta-wa-humbe wokutanga inga citatijo mugore. Wakambovona murarabungu here?

Perapo Jehovha wakabvunja Nowa no mbhuri yake kuti vave no vana zve vazaje nyika.