Noa nuukwanegumbo we nosho wo iinamwenyo, oya yi monguluwato. Jehova okwe edhile po, nomvula oya tameke okuloka. Oya loko noonkondo sigo onguluwato tayi kaama kombanda yomeya. Hugunina, evi alihe olyu udha omeya. Aantu ayehe mboka ya li haya longo uuwinayi oya sile mEyelu. Noa nuukwanegumbo we oya hupile monguluwato. Dhiladhila owala nkene ya li ya nyanyukwa, molwaashono ya vulika kuJehova.

Omvula oya loko omasiku 40 uusiku nomutenya, noya sheka. Omeya oge ende taga shuna pevi kashona nakashona. Hugunina onguluwato oya hakele koondundu. Kehe pamwe opwa li natango pu na omeya ogendji, onkene Noa nuukwanegumbo we inaya thikila taya zi mo monguluwato.

Omeya oga pwine po kashona nakashona. Noa noyaandjawo monguluwato oya kala mo uule womvula nasha. Opo nduno Jehova okwe ya lombwele kutya otaya vulu okuza mo ya ye muuyuni mboka wa li tawu monika wa fa uupe. Oya li ya pandula noonkondo, sho Jehova e ya hupitha. Olupandu lwawo oye lu ulike, sho ya gandja eyambo kuJehova.

Jehova okwa li a nyanyukilwa eyambo ndyoka. Okwa li u uvaneke kutya ita ka hanagula po we ashihe shoka shi li kevi nEyelu. Okwa holokitha uutamvula kegulu, wu kale endhindhiliko lyaashoka u uvaneka. Mbela owa mona nale uutamvula?

Jehova okwa lombwele Noa noyaandjawo ya vale aanona noyu udhithe evi.