Noakhi, ösi nomonia, hegöi urifö si möi ba nowo. Ikusi Yehowa mbawandruhönia, ba ibörötaigö atoru deu. Abölö-bölö sibai deu andrö, ba ibörögö molaya nowo. Lua-luania, anönö danö idanö. Mate fefu niha si lö sökhi si so baero ba nowo. Hizaʼi, teʼorifi Noakhi hegöi ösi nomonia bakha ba nowo. Hadia tola ökhalaigö hewisa waʼomuso dödöra me no laʼoʼö niwaʼö Yehowa?

Lö aetu-aetu deu, faʼarania 40 ngaluo ba 40 wongi. Ibörötaigö alö nidanö. Lua-luania tosake nowo ba hili. Hizaʼi, so nasa misa nidanö. Tobali, lö iʼanemaiʼö möi baero Noakhi hegöi ösi nomonia moroi ba nowo.

Arara manö, ibörötaigö oköli danö. Töra döfi waʼara Noakhi hegöi ösi nomonia bakha ba nowo. Aefa daʼö, iwaʼö khöra Yehowa wa no tola möi ira baero. Laʼandrö sibai saohagölö me no iʼorifi ira Yehowa, ba laforomaʼö daʼö me labeʼe zumange khö Yehowa.

Omasi Yehowa zumange andrö. Ilau fawuʼu li wa lö saʼae irai ifalua molö sabölö-bölö ba wangohori si so ba gulidanö. Si tobali tandra ba mbuʼusa linia andrö, ifazökhi ndrumi si oföna sibai oroma ba dalu mbanua. Hadia no irai öʼila ndrumi?

Iwaʼö Yehowa khö Noakhi hegöi ba nösi nomonia enaʼö moʼono ira ba lanönöi gulidanö.