Noa, ab’eka ye, n’enyamaishwa bakaza omu meeri. Yehova akakinga orwigi, kandi enjura yaatandika kugwa. Enjura ekagwa munonga reero emeeri ekatandika kuzeereera aha maizi. Ensi yoona ekaijura amaizi. Abantu boona abaabaire batari mu bwato bakafa. Kwonka Noa n’eka ye bakaba bari gye omu emeeri. Teekateeka aha kushemererwa oku baatungire ahabw’okworobera Yehova.

Enjura ekagwa kumara ebiro 40 nyomushana na nyekiro, bwanyima ekarekyera aho. Mporampora amaizi gakaguma nigatuuba. Bwanyima emeeri ekeemerera aha rushozi. Kwonka nabwo hakaba hakiriho amaizi maingi omu myanya endiijo, Noa n’eka ye bakaba batarikubaasa kuruga omu meeri.

Amaizi gakaguma nigooma mporampora. Noa n’eka ye bakaguma omu meeri kumara nk’omwaka gumwe. Bwanyima Yehova yaabagira ngu nibabaasa kushohora barugye omu meeri. Bakasiima munonga Yehova ahabw’okubajuna, kandi baakoreka okusiima kwabo barikuhayo ebitambo.

Yehova akasiima ebitambo ebyo. Akaraganisa ngu tarigaruka kucwekyereza ebiri omu nsi byona arikukoresa omwegyemure. Akareebekyesa omuhanganzima omu mwanya nk’akamanyiso k’okuraganisa okwo. Orareebire omuhanganzima?

Bwanyima Yehova akagambira Noa n’ab’eka ye kuzaara abaana bakaijuza ensi.