Noeca paipaj familiandij animalcunandijmi arcaman yaicurcacuna. Qꞌuipaca Jehová Dios punguta huichcajpimi tamyai callarirca. Yallitaj tamyajpimi arcaca huambui callarirca. Asha ashami yacuca tucui allpata taparca. Canllaman saquirijcunaca tucuicunami huañurca. Pero Noepish paipaj familiapish arca ucupi cashcamantami mana ima tucurcacuna. Paicunaca Diosta cazushcamantami cushilla sintirishcacuna canga ¿nachu?

40 punllacunata 40 tutacunata sinchita tamyashpami usyarirca. Tiempohuanca yacuca asha ashami chaquiri callarirca. Chaimi arcaca shuj urcu jahuapi shayarirca. Yacuca manaraj tucui chaquirishcachu carca. Chaimantami Noepish paipaj familiapish chai arcamanta mana llujshi tucurcacuna.

Punllacuna pasajpica yacuca tucuimi chaquirirca. Noepish paipaj familiapish arca ucupica huata yallitami causarcacuna. Chai qꞌuipaca Diosca, ‘arcamanta llujshichijlla’ nircami. Noeca paicunata quishpichishcamantami Diosta achcata agradicirca. Chaimantami paiman shuj ofrendata curca.

Diosca cushicushpami chai ofrendata chasquirca. Millai gentecunata tucuchingapajca cunan llaquichishca shinaca mana llaquichishachu nircami. Pai nishcata yuyarichunmi shuj señalta churarca. Chaimi cielopica punta cutin shuj cuichi ricurirca. ¿Cuichita ricushcanguichu?

Diosca Noeta paipaj churicunatapish huahuacunata charishpa, cai allpapi jundachinguichij nishpami mandarca.