Noepas familianpas animalkunapas arcamanmi jaykuranku. Jehová Diostaq arcaq punkunta wisq’aspa parachimuyta qallariran. Nishutapuni paramuqtintaq arcaqa unupi tuytuyta qallariran. Pisi-pisimantan unuqa orqokunatapas p’ampapuran. Llapa millay runakunan wañupuranku. Noewan familianwanmi ichaqa salvakuranku. Paykunaqa anchatachá kusikuranku Jehová Diosta kasukuspaqa.

40 p’unchayta 40 tutatawanmi nishutapuni paramuran, jinaspa tatipuran. Tiempowantaq unuqa pisiyapuyta qallariran jinan arcaqa orqo patapi tiyaykuran. Ichaqa askharaqmi unuqa kasharan, chaymi Noepas familianpas juj tiempotawanraq suyananku karan arcamanta lloqsinankupaq.

Pisi-pisimantan unuqa ch’akipuran. Noewan familianwanqa wata masmi arcapi tiyaranku. Chay qhepamanmi Jehová Dios niran arcamanta lloqsinankupaq. ¡Paykunapaqqa allpaqa mosoqpas kapunman jinan karan! Jehová Diostan agradecekuranku salvasqanmanta, jinan juj ofrendata jaywaranku.

Jehová Diosqa kusikuranmi ofrenda jaywasqankuwan, chaymi prometeran manaña jayk’aqpas runakunata jatun parawan wañuchinanpaq. Chay promesanta yuyarinankupaqmi k’uychita cielopi rijurichiran. ¿Jayk’aqllapas k’uychita rikurankichu?

Jinaspapas Jehová Diosqa allpantinpi junt’anankupaqmi Noeta familiantapas kamachiran.