О Ное хем лескири фамилија кхувѓе андре ки арка. О Јехова пханља о удар, хем почминѓа те дел бршим. Добором бут денѓа бршим со и арка почминѓа те уштел упро пани. Пало несаво време, цели Пхув сине учхарди пањеа. Нијекх лошно мануш со сине аври тари арка, на ачхило џивдо. Ама, о Ное хем лескири фамилија сине ко сигурно тхан, ки арка. Шај ли те замислине туке кобор сине радосна со шунѓе е Јехова?

Денѓа бршим 40 диве хем 40 раќа, хем пало адава чхинавѓа. О пани похари почминѓа те цидел пе тари пхув. Ко крајо, и арка ачхили ки јекх планина. Ама, панда сине бут пани, адалеске о Ное хем лескири фамилија нашти сине одма те икљовен тари арка.

Хари по хари, о пани шукило. О Ное хем лескири фамилија сине ки арка повише таро јекх берш. Тегани, о Јехова пхенѓа ленге те икљовен тари арка. Ки Пхув на сине нијекх лошно мануш. О Ное хем лескири фамилија сине бут благодарна со спасинѓа лен о Јехова, хем адава сикавѓе адалеа со денѓе жртва е Јеховаске.

О Јехова сине радосно баши акаја жртва. Ов ветинѓа кај никогаш нане те уништинел потопеа са сој ки Пхув. Сар знако башо адава ветување, ов керѓа те појавинел пе ко небо о прво виножито. Дали некогаш дикхљан виножито?

Тегани о Јехова вакерѓа е Ноеске хем лескере фамилијаке те овел лен чхаве хем те пхерен и Пхув манушенцар.