O Noe hem leskiri familija khuvgje andre ki arka. O Jehova phanlja o udar, hem počmingja te del bršim. Doborom but dengja bršim so i arka počmingja te uštel upro pani. Palo nesavo vreme, celi Phuv sine učhardi panjea. Nijekh lošno manuš so sine avri tari arka, na ačhilo dživdo. Ama, o Noe hem leskiri familija sine ko sigurno than, ki arka. Šaj li te zamisline tuke kobor sine radosna so šungje e Jehova?

Dengja bršim 40 dive hem 40 rakja, hem palo adava čhinavgja. O pani pohari počmingja te cidel pe tari phuv. Ko krajo, i arka ačhili ki jekh planina. Ama, panda sine but pani, adaleske o Noe hem leskiri familija našti sine odma te ikljoven tari arka.

Hari po hari, o pani šukilo. O Noe hem leskiri familija sine ki arka poviše taro jekh berš. Tegani, o Jehova phengja lenge te ikljoven tari arka. Ki Phuv na sine nijekh lošno manuš. O Noe hem leskiri familija sine but blagodarna so spasingja len o Jehova, hem adava sikavgje adalea so dengje žrtva e Jehovaske.

O Jehova sine radosno baši akaja žrtva. Ov vetingja kaj nikogaš nane te uništinel potopea sa soj ki Phuv. Sar znako bašo adava vetuvanje, ov kergja te pojavinel pe ko nebo o prvo vinožito. Dali nekogaš dikhljan vinožito?

Tegani o Jehova vakergja e Noeske hem leskere familijake te ovel len čhave hem te pheren i Phuv manušencar.