O Noje hem oljesi porodica khuvdže andre ki arka. O Jehova phanlja o udar hem počmindža te džal boršim. Odobor but dželo boršim so i arka počmindža te uštel upro pani. Palo nesavo vreme, celo phuv hine učhardi panjeja. So ulo okolje lošno manušencar kola na khuvdže ki arka? On na ačhilje dživde. Ama, o Noje hem oljesi porodica hine ko sigurno than, ki arka. Šaj li te zamisline kobor hine radosna so šundže e Jehova?

O boršim dželo 40 dive hem 40 rača, hem palo odova prestajindža. O pani pohari počmindža te cidel pe andi phuv. Ko krajo, i arka ačhilji ki jekh planina. Ama, pana hine but pani, odoljese o Noje hem oljesi porodica naštindže odmah te ikljon andi arka.

Hari po hari, o pani šučilo. O Noje hem oljesi porodica hine ki arka pobuter ando jekh berš. Tegani, o Jehova phendža ljendže te ikljon andi arka. Ki phuv na hine nijekh lošno manuš. O Noje hem oljesi porodica hine but zahvalna so spasindža ljen o Jehova, hem odova mothovdže adžahar so dindže žrtva e Jehovase.

O Jehova hine radosno so čerdže odova. Ov obećindža so niked na ka uništini o sveto potopeja. Sar znako aso odova obećanje, ov čerdža te pojavini pe ko nebo i prvo duga. Da li nekad dikhljan i duga?

Tegani o Jehova phendža e Nojese hem oljese porodicače te ovel ljen čhave hem te pheren i phuv e manušencar.