Nohi, minisi manninna addi addi saada markaawete giddora eˈu. Hakkiinni Yihowa markaawete saanqa cufeenna xeena gana hanafi. Lowo xeena ganino daafira markaawe wayi duhi. Gedensaanni wayi baatto gudise diwi. Markaawete giddora einokkihu bushu manni baalu reyi. Nohinna minisi manni kayinni markaawete giddo noo daafira ikkinori dino. Insa Yihowa asse yiinore assitino daafira, mageeshshi geeshsha hagiidhitinoha lawannohe?

Xeena 40 barranna 40 hashsha ganino; hakkiinni xeenu birri. Uullate aana woˈmino wayino xeanni xeanni haˈri. Wayi xeanni haˈrita markaawe ilaalu aana uurritu. Ikkirono, uullate aana wayi woˈme noo daafira Nohinna minisi manni markaawete giddonni fula didandiino.

Sunu sununni wayi goofita uulla mooltu. Nohinna minisi manni markaawete giddo keeshshino yanna mitto diro saˈanno. Yihowa insa ‘Xaate markaawete giddonni fulle’ yiinsa; insa fultanno woyite gobba wole gobba labbanno. Insa Yihowa gatisinonsa daafira iso galaxxitino; konni daafira Isira kakkalo shiqishshino.

Yihowa insa shiqishshino kakkalo hagiidhe adhino. Isi ‘Layinkita uullate aana noore baala gudate baote waa diabbeemmo’ yiino. Yihowa baote waa abbannokkita leellishate gordoho magani-seemo fultanno gede assino. Magani-seemo laˈe egennootto?

Hakkiinni Yihowa Nohinna minisi manni ooso ile uulla woˈmanno gede kulinsa.