Na ō i totonu o le vaa Noa, o lona aiga ma manu. Na tapuni e Ieova le faitotoʻa o le vaa ma ua amata ona timu. O le mamafa tele o timuga na amata ai ona opeopea le vaa i luga o le vai. E leʻi umi ae ufitia le lalolagi atoa i le vai. O tagata uma sa i fafo o le vaa, na feoti uma i latou. E na o Noa ma lona aiga na faasaoina ma saogalemu i totonu o le vaa. Seʻi mafaufau i le fiafia o Noa ma lona aiga ona na latou usiusitaʻi iā Ieova.

E 40 ao, 40 pō na matuā mamafa ai timuga, ona uma lea. Na faasolosolo ona māui atu le vai, ma iʻu ai ina tū le vaa i luga o se mauga. Ae sa iai pea vaega o le laueleele na ufitia i le vai, ma e leʻi mafai ai e Noa ma lona aiga ona ō i fafo o le vaa i le taimi lenā.

Na faasolosolo lava ona māui atu le vai. E sili atu i le tasi le tausaga na iai Noa ma lona aiga i totonu o le vaa. Ona fai atu lea o Ieova ua mafai ona latou ō i fafo o le vaa, ma ō atu i se lalolagi ua faamamāina mai i tagata leaga. Na latou matuā lotofaafetai na faasaoina i latou e Ieova. O lea na latou faia ai se taulaga iā Ieova e faaalia ai lo latou lotofaafetai.

Sa fiafia Ieova i lenā taulaga. Na ia folafola mai e na te lē toe faaumatia mea uma i le lalolagi e ala i se lolo. Ina ia faamautinoa lenā folafolaga, na faaali mai e Ieova le nuanua. O le nuanua muamua lava lea. Po ua e vaai i se nuanua?

Na faapea atu foʻi Ieova iā Noa ma lona aiga, ia fanafanau ma faatumu ai le lalolagi.