Noa, en osofamiri nanga den meti go na ini na ark. Yehovah tapu a doro, ne alen bigin fadon. Alen kon so hebi taki na ark bigin drifi tapu a watra. Te fu kaba, a heri grontapu ben sungu nanga watra. Ala den ogrisma dede, fu di den no ben de na ini na ark. Ma Noa nanga en osofamiri di ben de na ini na ark, tan na libi. Prakseri fa den ben breiti taki den arki Yehovah!

Alen fadon 40 dei nanga 40 neti. Baka dati a stop. Safrisafri a watra bigin saka. Baka wan pisi ten na ark fasi na tapu den bergi. Ma ala sei ben lai watra ete. Dati meki Noa nanga en osofamiri no ben man komoto na ini na ark.

Safrisafri a gron bigin drei. Moro leki wán yari, Noa nanga en osofamiri ben de na ini na ark. Dan Yehovah taigi den fu komoto na ini na ark. Now den ben de na ini wan grontapu pe nowan ogrisma ben de moro. Den ben breiti taki Yehovah ben meki den tan na libi èn dati meki den tyari wan ofrandi gi en fu taki en tangi.

Yehovah ben prisiri nanga na ofrandi. A pramisi taki noiti moro a o tyari wan frudu kon fu pori ala sani na grontapu. Dati meki a poti a fosi alenbo na ini den wolku fu memre sma na a pramisi di a meki. Yu si wan alenbo kaba?

Baka dati Yehovah taigi Noa nanga en osofamiri fu meki pikin teleki den kon lai na grontapu.