I Noakẹ̌, kěluargane, dingangu manga binatang simuẹ̌ su ral᷊ungu bahtera. Yehuwa něnutu tukade, kụ tahiti něnětạ nariadi. Tahiti ene sěbạe mal᷊awọ, kụ bahtera něnětạ dimal᷊ěto. Samurine, dunia natutu dingangu akẹ. Su rělahu bahtera, kěbị taumata ral᷊akị nate. Katewe, i Noakẹ̌ dingangu kěluargane aman su ral᷊ungu bahtera. I sire tantu sěbạe mal᷊uasẹ̌ ual᷊ingu timuhụ si Yehuwa. Apa i kau botonge mẹ̌pikirẹ̌ kerea pěndang i sire?

Tahiti nariadi karěngụe 40 ěllo 40 hěbi, bọu ene něngědo. Kakạděngụe akẹ kakạhal᷊ine, kụ bahtera nasampelẹ̌ su manga wul᷊udẹ̌. Katewe bědang piạ akẹ su lawọ tampạ. Hakị u ene, i Noakẹ̌ dingangu kěluargane bědang tawe siměbang bọu bahtera.

Kakạděngụe, ěntana něnětạ namara. Noakẹ̌ dingangu kěluargane ene su ral᷊ungu bahtera nal᷊iu wọu sěntaung. Bọu ene, Yehuwa naul᷊ị i sire seng botonge suměbang. I sire sěbạe mal᷊uasẹ̌ ual᷊ingu Yehuwa něnal᷊amatẹ̌ si sire. Hakị u ene, i sire něgělị sasěmbah si Yehuwa.

Yehuwa mal᷊uasẹ̌ něnarimạ sasěmbah ene. I Sie nẹ̌diandi seng tawe měminasa dunia měpakẹ lěba. Gunang makoạ tatialang diandi-Ne, i Sie někoạ pelangi su langị. Apa i kau bọu nakasilo pelangi?

Bọu ene Yehuwa něngoro si Noakẹ̌ dingangu kěluargane gunang pědeạ anạ dingangu měmenẹ dunia.