LESOGNE 6
Ndaty Valo Avao ty Sisa Velogne
Fa agnate i sambofiaray ao ty ry Noa mirofoko naho i biby rey. Nihilia i Jehovah i lalagney, le niavy amy izay i oragney. Nanomboke nitsikafogne i sambofiaray. Tafara izay, le nifeno rano iaby ty tane toy. Nimatemate iaby ze ndaty tsy tagnate i sambofiaray ao, fa i Noa naho ty keleia’e avao ro niavotse. Fale iareo tamy izay fa nankatò i Jehovah.
Avy bey avao i oragney tagnate ty 40 andro naho 40 halegne. Nihegne tsikikede amy izay i ranoy tafara izay. Nijanogne tambone ty vohitse raike amy izay i sambofiaray. Tsy afake niakatse tao ty ry Noa, satria mbe nifeno rano iaby i taney.
Nimaike avao i ranoy tamy ty fara’e. Tao’e raike mahery ty nijanogna iareo tagnate i sambofiaray ao. Fa tsy nahatrea mpanao raty sasa iareo naho fa nampiakare i Jehovah boake agnate i sambofiaray ao. Fale iareo fa navota i Jehovah. Te hisaotse i Jehovah iareo le nanao fagnatetse ho aze.
Nahafale i Jehovah i fagnatetsey. Nisaontsy reke fa tsy handefa safodrano ambone tane etoy sasa. Nisia’e havagne ty amy i lagnitsey ey ho famantaragne fa tsy hanao izay sasa reke. Fa nahatrea havagne vao rehe?
Nisaontsia i Jehovah ty Noa naho ty keleia’e mba hanagn’anake sady hameno ty tane toy.
‘Nizilike tagnate i sambofiaray ao ty Noa. Faie tsy nidare o ndatio amparake ty niavia i Ranobey namaoke iareo iabỳ.’—Matio 24:38, 39