Nowa ndi banja laki angusere muchingaraŵa limoza ndi nyama. Yehova wangujala chisasa cha chingaraŵa ndipu vuwa yingwamba kuwa. Kunguwa chivuwa chikulu ndipu chingaraŵa chingwamba kuyanjama. Pakumaliya, charu chosi chinguzaza maji. Ŵanthu wosi aheni wo anguleka kusere muchingaraŵa angufwa. Nowa ndi banja laki angufwa cha chifukwa ŵenga muchingaraŵa. Kumbi uwona kuti angukondwa chifukwa chakuti anguvwiya Yehova?

Vuwa yinguwa kwa mazuŵa 40 usiku ndi musana ndipu pavuli paki yinguleka. Maji ngangwamba kuphwa kamana kamana. Pakumaliya, chingaraŵa chingujalikika pachanya pamapiri. Pacharu chapasi penga mbwenu maji nganandi. Mwaviyo, Nowa ndi banja laki atingi atuwengemu cha muchingaraŵa pa nyengu yeniyo.

Kamana ndi kamana, pasi pangumira. Nowa ndi banja laki anguja muchingaraŵa kujumpha chaka chimoza. Pavuli paki, Yehova wanguŵakambiya kuti atuwemu aje mucharu cho chawonekanga nge chifya. Yiwu angumuwonga ukongwa Yehova chifukwa chakuti wanguŵataska ndipu angukupereka sembi kulongo kuwonga.

Yehova wangukondwa ndi sembi yeniyi. Iyu wangulayizga kuti wazamunanga so cha vinthu pacharu chapasi ndi chigumula. Yehova wangupanga chiŵingavuwa chakwamba cho chawonekanga mumitambu kulongo kuti vo wangulayizga venga vauneneska. Ukuchiwonapu chiŵingavuwa?

Pavuli paki, Yehova wangukambiya Nowa ndi banja laki kuti abalani, azazi charu chapasi.