CIIYO 6
Bantu Bali 8 Bafwutuka Akunjila Munyika Mpya
Nowa amukwasyi wakwe, alimwi abanyama bakanjila mubwato. Jehova wakaujala mulyango, mpoonya mvwula yakatalika kuwa. Yakawa mvwula mpati cakuti bwato bwakatalika kwiibauka. Mukuya kwamazuba, nyika yoonse yakabbila mumaanzi. Bantu boonse babyaabi ibatakanjila mubwato bakafwa. Pele Nowa amukwasyi wakwe bakalikwabilidwe mukati. Koyeeya buyo mbobakakomana akaambo kakumvwida Jehova!
Imvwula yakawa kwamazuba aali 40 masiku asyikati, mpoonya yakaleka. Asyoonto-syoonto maanzi akali kuyaabuceya. Mpoonya bwato bwakakkala atala aamalundu. Nokuba boobo, maanzi akaciliko mumasena aamwi, aboobo Nowa amukwasyi wakwe tiibakazwa mubwato mpoonya-mpoonya pe.
Asyoonto-syoonto maanzi akayuminina. Nowa amukwasyi wakwe bakakkala mubwato kwaciindi ciinda kumwaka omwe. Mpoonya Jehova wakabaambila kuti bazwe mubwato akuya mubusena ibwakali kuboneka mbuli nyika mpya. Bakamulumba kapati Jehova akaambo kakubafwutula, alimwi bakatondezya kulumba kwiinda mukupa cituuzyo kuli Jehova.
Jehova wakacikkomanina cituuzyo eeco. Wakasyomezya kuti kunyina nayoonyonyoona zintu zyoonse zyamunyika kubelesya zambangulwe. Aboobo wakapanga fwulicoongo wakusaanguna kuti alibonye mumakumbi kutegwa cibe citondezyo cacisyomezyo eeco. Sena wakamubona kale fwulicoongo?
Mpoonya Jehova wakaambila Nowa amukwasyi wakwe kuti bazyale bana akuzuzya nyika.
“Nowa wakanjila mubwato, pele [bantu] tiibakabikkila maano kusikila mane Zambangulwe lyakaboola akubatola boonse.”—Matayo 24:38, 39
Andiza Inga Mwaakkomanina Ayaaya
AMWIIYE LUSYOMO LWABO
Nowa—‘Wakeenda a Leza Wakasimpe’
Mbuyumuyumu nzi Nowa amukaintu wakwe mbobakajana nobakali kukomezya bana babo? Nkaambo nzi kuyaka bwato ncokwakali kuyandika kuti babe alusyomo?
