Nuha, eka ye, hamu n’ebisoro bakataaha omu lyato. Yahwe akakinga orwigi rw’elyato, hanyuma enjura yatandika kugwa. Hakagwa enjura y’amaani, ekyaletiire elyato kutandika kusereera. Hanyuma y’obwire, ensi yoona ekaswekwa amaizi. Abantu boona abaali aheru y’elyato bakafa. Baitu Nuha n’eka ye bakakira habwokuba bakaba bali omu lyato. Nosobora kuteramu akasisani okarora omulingo barozere oburungi bw’okworobera Yahwe?

Enjura ekagwa nyamusana n’ekiro kumara ebiro 40. Hanyuma amaizi gakatandika kukeha mporampora. Elyato likamalirra lyemeriire ha rusozi. Baitu ebicweka ebindi byona bikaba bikyaswekerwe amaizi, nahabweki Nuha n’eka ye bakaba baine kulinda.

Amaizi gakaikara nigakeeha mporampora. Nahabweki, Nuha n’eka ye bakamara omwaka gumu n’ebiro ebirukuhinguramu bali omu lyato. Hanyuma Yahwe akabagambira kuruga omu lyato nukwo batandike kwikara omu nsi ekaba n’esisana empyaka. Bakahongera Yahwe ebihongwa kwoleka okusiima kwabo habwokubajuna.

Yahwe akasiima ebihongwa byabo. Akabaraganiza ngu talyongera kukozesa okusandaara kw’amaizi kuhwerekereza ebintu byona omu nsi. Kubagumya ngu akaba nagenda kukora eky’abaraganiize, akataho omuhangaizima omu mwanya. Wakaroraga omuhangaizima?

Hanyuma, Yahwe akagambira Nuha n’eka ye kuzaara abaana bakanye nukwo baijuze ensi.