Ua haere Noa, to ˈna utuafare e te mau animara i roto i te araka. Ua tamau atura Iehova i te opani e ua haamata ˈtura te ûa i te topa. No te puai o te ûa i haamata ˈi te araka i te tere. I te pae hopea, ua î roa te fenua i te pape. I rapaeau i te araka, ua pohe te feia ino atoa. I roto râ i te araka, ua ora mai Noa e to ˈna utuafare. A feruri na i to ratou oaoa rahi no te mea ua faaroo ratou ia Iehova.

Ua ûa e 40 po e e 40 ao i te maoro. I muri iho, ua mau te ûa. Ua iti mǎrû noa mai te pape. I te pae hopea, ua mau te araka i nia i te mouˈa. Tera râ, e rave rahi noâ pape i nia i te fenua. Aita ïa Noa e to ˈna utuafare i nehenehe e haere i rapae i te araka i tera taime.

Mǎrû noa mai te fenua i te mǎrô. Ua vai Noa e to ˈna utuafare i roto i te araka hoê matahiti i te maoro. I muri iho, ua parau atu Iehova e e nehenehe ratou e haere i rapae i te araka no te ora i roto i te hoê ao aita faahou e feia ino. Ua mauruuru roa ratou no te mea ua faaora Iehova ia ratou. E ua faaite ratou i te reira ma te pûpû i te hoê tusia na Iehova.

Ua oaoa Iehova no tera tusia. Ua fafau Iehova e aita roa ˈtu oia e haamou faahou i te mau mea atoa i nia i te fenua nei ma te faaohipa i te diluvi. No te haapapu i tera parau fafau, ua faatupu oia i te anuanua matamua i roto i te raˈi. Ua ite ê na anei oe i te hoê anuanua?

Ua parau atoa Iehova ia Noa e i to ˈna utuafare ia tamariihia e ia faaî i te fenua.